İmam Əli (ə) müqəddəs hərəminin mərkəzi xəbər bürosunun məlumatına görə, İraq Respublikasındakı Livan Respublikasının yeni səfiri Xəlil Abdullah Məhəmməd, Möminlərin Əmiri imam Əlinin (ə) müqəddəs məzarını ziyarət etmək şərəfinə nail olub. Bu görüşdə imam Əli (ə) müqəddəs hərəminin himayədarının müavini Həsən ət-Tai və İctimaiyyətlə Əlaqələr şöbəsinin müdiri onu qarşılayıblar.
Hərəmin İctimaiyyətlə Əlaqələr şöbəsinin müdiri Sahib əl-Bəsisi mərkəzi xəbər bürosuna açıqlamasında bildirib: Görüşdə qarşılıqlı əməkdaşlığın gücləndirilməsi yolları və iki qardaş ölkə arasında mövcud olan əlaqələrin dərinliyi müzakirə edilib. Həmçinin, imam Əli (ə) müqəddəs hərəmini ziyarət edən Livan zəvvarlarının işləri və xüsusilə milyonluq ziyarətlər zamanı ziyarətlərini yerinə yetirmələri üçün lazımi şəraitin və xidmətlərin göstərilməsi müzakirə olunub.
Livan səfiri də İraqa səfərlərinin ilk istiqamətinin Nəcəf şəhəri və Möminlərin Əmiri imam Əlinin (ə) müqəddəs məzarı olmasından məmnunluğunu ifadə edərək, göstərilən səmimi qəbula görə dərin minnətdarlığını və təşəkkürünü bildirib və imam Əli (ə) müqəddəs hərəminin dünyanın hər yerindən, islam ölkələrindən və xüsusilə Livandan gələn zəvvarlara xidmət sahəsində göstərdiyi geniş səyləri yüksək qiymətləndirib.
