İmam Əli (ə) hərəmində təxminən 1 000 nəfər İraq Polis Akademiyasının tələbəsi Məhərrəm və Səfər aylarında zəvvarlara xidmət göstərilməsi istiqamətindəki səylərinə görə təltif olunub.
İmam Əli (ə) hərəminin Mühafizə şöbəsi İraq Polisinin 2 saylı Polis Akademiyasının tələbələrinin təltif olunması münasibətilə mərasim keçirib.
Mərasim İmam Hüseynin (ə) Ərbəin ziyarəti və İslam Peyğəmbərinin (s) şəhadətinin ildönümü günlərində İmam Əli (ə) hərəminin zəvvarlarının təhlükəsizliyinin təmin edilməsində göstərdikləri xidmətlərə görə tələbələrə təşəkkür etmək məqsədilə təşkil olunub.
Mərasimdə İmam Əli (ə) hərəminin mütəvəllisi Höccətül-islam vəl-müslimin Seyid İsa Xərsan, eləcə də Mühafizə, İctimaiyyətlə Əlaqələr və Media şöbələrinin rəhbərləri iştirak ediblər. Tədbir Fatimə (s.ə) həyətində yerləşən Həzrət Amənə (s.ə) salonunda keçirilib.
İmam Əli (ə) hərəminin mütəvəllisi çıxışında tələbələri salamlayaraq, bu iki mərasim zamanı təhlükəsizliyin təmin olunmasında iştirak edən cəsur tələbələrə təşəkkür edib və bildirib:
“Qurani-Kərimin ayələrində və hədislərdə insanın Qiyamət günü ömrü və onu necə keçirdiyi barədə sorğu-sual olunacağı bildirilir. Bu isə zamanın böyük dəyərini və insanın Allah yolunda, eləcə də başqalarına xidmət naminə gördüyü işlərin əhəmiyyətini göstərir.”
O vurğulayıb ki, tələbələrə verilən bu dəyərli fürsət onlar üçün həm dünyada, həm də axirətdə xeyirli nəticələr doğuracaq. Həmçinin müqəddəs hərəmlərdə zəvvarlara və əzadarlara xidmət etmək Allah-Təalanın yanında yüksək məqama malikdir və bununla yanaşı, möminlərin və zəvvarların səmimi dualarını da qazandırır.
İmam Əli (ə) hərəminin mütəvəllisi çıxışının sonunda zabitlərə, əməkdaşlara və tələbələrə bu iki böyük münasibət zamanı zəvvarlara xidmət göstərməkdəki səylərinə görə təşəkkür edib və onların üzərlərinə düşən vəzifələri səmimiyyətlə yerinə yetirmələrini yüksək qiymətləndirib.
İraq Polisinin 2 saylı Polis Akademiyasının rəisi, briqada generalı Salah Salman əş-Şəməri bu təşəbbüsə görə təşəkkürünü bildirərək deyib:
“İmam Əli (ə) hərəmi daim təhlükəsizlik qurumlarını dəstəkləyib, davamlı iştirakı, mənəvi dəstəyi və onlarla geniş koordinasiya vasitəsilə təhlükəsizlik orqanlarının yanında olub.”
O əlavə edib:
“Təhlükəsizlik qüvvələri belə təqdirəlayiq münasibətə layiqdirlər. Çünki onlar zəvvarlara xidmət göstərilməsi və ziyarətlərin təhlükəsizliyinin təmin olunması istiqamətində böyük səylər göstərirlər.”
Şəməri həmçinin bildirib:
“İmam Əli (ə) hərəmində çalışan bütün əməkdaşlar bu mərasimlər zamanı iştirak edib və Mühafizə şöbəsinin xidmətçiləri ilə əməkdaşlıq ediblər. Bu isə koordinasiyanın lazımi səviyyədə təmin olunmasına və cari il ərzində vəzifələrin yerinə yetirilməsi prosesinin daha səmərəli təşkilinə mühüm töhfə verib.”
Bu təltif mərasimi ardıcıl ikinci il keçirilir və Bəsrə vilayətində yerləşən İraq Polisinin 2 saylı Akademiyasının tələbələrinin üzərlərinə düşən vəzifələri yerinə yetirmələri, eləcə də İmam Əli (ə) hərəminin Mühafizə şöbəsinin xidmətçilərinə İmam Hüseynin (ə) Ərbəin mərasimi və İslam Peyğəmbərinin (s) şəhadətinin ildönümünün qeyd olunması zamanı göstərdikləri dəstəyə görə təşəkkür məqsədi daşıyır.
Onların səyləri zəvvarların hərəkətinin asanlaşdırılmasında və zəvvarlar üçün təhlükəsiz şəraitin yaradılmasında mühüm rol oynayıb.
