Nəcəf-Əşrəf elmi hövzəsinin minillik yubileyinin qeyd olunması proqramı çərçivəsində “Ən-Nəhc” jurnalının elmi ekspertiza (rəy) prosesi başa çatmışdır.
İmam Əli (ə) hərəminin nəzdində fəaliyyət göstərən Ələvi İslam Tədqiqatları və Araşdırmaları Məclisi tərəfindən nəşr olunan “Ən-Nəhc” jurnalı elmi rəy mərhələlərini tamamladıqdan sonra İraqın Ali Təhsil və Elmi Tədqiqatlar Nazirliyinin yekun təsdiqini almışdır.
Bu addım jurnalın elmi və akademik mövqeyinin yüksəldilməsi, eləcə də onun tədqiqat fəaliyyətinin əhatə dairəsinin genişləndirilməsi istiqamətində mühüm addım hesab olunur.
Ələvi Məclisinin rəhbəri Şeyx Səlam Nasiri Xəbər Mərkəzinə verdiyi müsahibədə bildirmişdir: “Jurnalın elmi ekspertizadan keçirilməsi İmam Əli (ə) hərəminin Nəcəf-Əşrəf elmi hövzəsinin minillik yubileyini qeyd etmək, onun elmi və tədqiqat sahəsindəki mövqeyini gücləndirmək istiqamətində həyata keçirdiyi davamlı səylər çərçivəsində baş tutur”.
O, əlavə etmişdir ki, jurnalın nəşrində əsas məqsəd tədqiqatçıları cəlb etmək və müxtəlif elm sahələrinin mütəxəssislərinə xidmət göstərmək üçün etibarlı elmi platforma yaratmaqdır.
Şeyx Səlam Nasiri daha sonra qeyd etmişdir: “Jurnalın Nəcəf-Əşrəf elmi hövzəsinin minillik yubileyinə, eləcə də bu yubileyin elmi və idraki tələblərinə həsr olunmuş üçüncü nömrəsi nəşr ediləcək. Dördüncü nömrə isə Şeyxut-Taifə (Təriqət şeyxi) kimi tanınan Şeyx Tusinin (q.s.) şəxsiyyətinə həsr olunacaq. Bu nömrədə onun düşüncələri, elmi irsi və etiqadi baxışları təhlil ediləcək”.
O, həmçinin müxtəlif ərəb, İslam və Afrika ölkələrindən olan mütəxəssis tədqiqatçıların jurnalda iştirakına diqqət çəkmişdir.
“Ən-Nəhc” jurnalı İmam Əli (ə) hərəminin Fikir və Mədəniyyət İşləri Şöbəsinə bağlı Ələvi Məclisi tərəfindən ildə iki dəfə nəşr olunur. Jurnal elmi-tədqiqat fəaliyyətini dəstəkləmək, eləcə də Əmirəlmöminin İmam Əlinin (ə) elmi irsi və Nəcəf-Əşrəf elmi hövzəsi ilə bağlı ixtisaslaşmış araşdırmaları inkişaf etdirmək məqsədi daşıyır.
