İmam Əli (ə) hərəmi, Nəcəf Yol Polisi ilə əməkdaşlıq çərçivəsində 900-dən çox sürücü üçün silsilə təlim seminarları təşkil edib.
İmam Əli (ə) hərəminin Planlaşdırma və İnkişaf şöbəsinin “Nəzm” mərkəzi, Təhsil və İnkişaf bölməsi vasitəsilə və Nəcəf şəhərinin Baş Yol Polisi İdarəsinin əməkdaşlığı ilə hərəmin müxtəlif bölmələrində sürücü kimi fəaliyyət göstərən xidmətçilər üçün ixtisaslaşdırılmış təlim seminarları keçirib.
Bu təşəbbüs sürücülərin yol hərəkəti qaydaları haqqında məlumatlılığının artırılması, onların yol hərəkəti qayda və qanunlarına riayət etmə səviyyəsinin yüksəldilməsi məqsədilə həyata keçirilən inkişaf proqramları çərçivəsində reallaşıb. Bu addım daha təhlükəsiz sürücülük mühitinin yaradılmasına, sürücülərin və sərnişinlərin sağlamlığının qorunmasına, habelə sürücülərin vəzifələrini yerinə yetirərkən qarşılaşa biləcəkləri müxtəlif yol hərəkəti vəziyyətlərinə düzgün yanaşma bacarıqlarının artırılmasına kömək edir.
Təhsil və İnkişaf şöbəsinin rəhbəri Həsən əl-Hindavi bildirib: “İmam Əli (ə) hərəminin müxtəlif bölmələrində çalışan 900-dən çox sürücü bu seminarlarda iştirak edib. Kurslar yol hərəkəti və hüquq sahəsindəki mütəxəssislərlə birlikdə təşkil edilib ki, təlim məzmunu sürücülərin işinin mahiyyətinə və gündəlik ehtiyaclarına uyğun olsun”.
O əlavə edib: “Seminarlarda təlimin yalnız nəzəriyyə ilə məhdudlaşmamasına çalışdıq. Bu səbəbdən proqrama praktik fəaliyyətlər və real yol hərəkəti vəziyyətlərinin imitasiyası (simulyasiyası) daxil edilib ki, bu da biliklərin möhkəmlənməsinə və onların sükan arxasında praktiki bacarıqlara çevrilməsinə kömək edir”.
Seminarlarda yol təhlükəsizliyi, təhlükəsiz sürücülük prinsipləri, yol hərəkətinin ən vacib qayda və təlimatları, eləcə də iş başında olarkən, işçiləri və qonaqları daşıyarkən sürücünün məsuliyyətləri haqqında məlumatlandırılma kimi müxtəlif mövzular müzakirə edilib.
Bu seminarların keçirilməsi İmam Əli (ə) hərəmi rəhbərliyinin insan resurslarının inkişaf etdirilməsi və onların peşəkar səriştələrinin yüksəldilməsi strategiyası çərçivəsində həyata keçirilir. Bu strategiya hərəmin müxtəlif bölmələrində çalışan əməkdaşların vəzifə və məsuliyyətlərinə uyğun ixtisaslaşdırılmış təlim proqramları vasitəsilə davam etdirilir.
