İmam Əli (ə) hərəmi Ərbəin zəvvarlarının Nəcəf-əl-Əşrəf və müqəddəs Kərbəla arasında daşınması üçün lazımi hazırlıqları həyata keçirir.
İmam Əli (ə) hərəmi Ərbəin günləri üçün hazırlanmış proqramlar əsasında Nəcəf-əl-Əşrəf və müqəddəs Kərbəla arasında zəvvarların daşınması üçün lazımi avadanlıqları təmin edib. Bu əməliyyat planı zəvvarların gediş-gəlişini asanlaşdırmaq və milyonlarla insanın iştirak etdiyi bu mərasimdə göstərilən xidmətlərin səviyyəsini yüksəltmək məqsədilə gecə-gündüz həyata keçirilir.
Ziyarət turizmi bölməsinin məsul şəxsi Səccad əl-Xəfaci hərəmin Xəbər Mərkəzinə verdiyi müsahibədə bildirib: «Bu bölmə Ərbəinə xüsusi xidmət proqramı çərçivəsində nəqliyyat əməliyyatı ilə bağlı bütün texniki və inzibati hazırlıqları tamamladıqdan sonra Nəcəf-əl-Əşrəf və müqəddəs Kərbəla şəhərləri arasında zəvvarların daşınması planını həyata keçirməyə başlayıb».
O əlavə edib: «Bu planın həyata keçirilməsi üçün 20 avtobus və 20 mikroavtobus təchiz olunub. Zəvvarların daşınmasının fasiləsiz həyata keçirilməsi, gediş-gəlişin rahat təmin olunması, həmçinin əziz zəvvarların rifah və rahatlığının təmin edilməsi məqsədilə bu nəqliyyat vasitələri gecə-gündüz üç növbə ilə fəaliyyət göstərir».
Əl-Xəfaci həmçinin qeyd edib: «Bu əməliyyat proqramı zəvvarların müqəddəs Kərbəladan Nəcəf-əl-Əşrəfə nizamlı şəkildə daşınması və onların təhlükəsiz hərəkəti üçün bütün lazımi imkanların təmin edilməsi məqsədilə həyata keçirilir. Bu, İmam Əli (ə) hərəminin milyonlarla Ərbəin zəvvarını qarşılamaq üçün hazırladığı genişmiqyaslı xidmət proqramının bir hissəsidir».
Qeyd edək ki, imam Əli (ə) hərəmi bütün insan resurslarını, xidmət imkanlarını və texniki vasitələrini səfərbər edərək Ərbəin zəvvarlarına xidmət göstərmək üçün genişmiqyaslı proqram həyata keçirir.
Bu xidmətlər, xüsusilə Nəcəf-əl-Əşrəfdə yerləşən Əmirəl-möminin həzrət Əlinin (ə) müqəddəs hərəmini ziyarət dayanacaqlarından biri kimi seçən və ziyarətdən sonra möhtəşəm Ərbəin mərasimində iştirak etmək üçün müqəddəs Kərbəlaya doğru piyada yürüşünü davam etdirən zəvvarlara göstərilir.
