Müqəddəs imam Əli (ə) hərəmi bildirib ki, builki Qədir-Xum bayramının qeyd olunması ilə bağlı proqram və tədbirlər bölgə xalqlarının üzləşdiyi fövqəladə şəraitə uyğun şəkildə təşkil ediləcək. Bu qərar, xüsusilə əzizlərini itirmiş insanlarla həmrəylik və hüzn hissi, eləcə də İran İslam Respublikasında və qardaş Livanda baş vermiş acı hadisələr nəzərə alınaraq qəbul edilib.
Hərəm rəhbərliyi vurğulayıb ki, proqramların mahiyyəti mövcud şəraitlə uzlaşacaq, eyni zamanda bayramın müqəddəsliyi və mənəvi ruhu qorunub saxlanılacaq.
Bu məsələ Nəcəf Əşrəfdə müxtəlif media qurumlarının iştirakı ilə keçirilən mətbuat konfransında müqəddəs imam Əli (ə) hərəminin media şöbəsinin müdiri Heydər Rəhimin Qədir Xum Beynəlxalq Həftəsinə hazırlıq işləri barədə verdiyi açıqlamalar zamanı gündəmə gətirilib.
O bildirib: Bu il “İydullahil-Əkbər”-in qeyd olunması mövcud şəraitə uyğun bir ab-havada keçiriləcək və əsas diqqət vilayət məfhumunu, eləcə də Möminlərin Əmiri həzrət Əlinin (ə) yoluna bağlılığı əks etdirən dini, mədəni və mənəvi məzmunlara yönələcək.
O əlavə edib: Bu ilki Qədir-Xum Beynəlxalq Həftəsi coğrafi sərhədləri aşan qlobal bir mesaj daşıyacaq və Qədir-Xum dəyərlərinin bəşəri və sivilizasiya yönünü nümayiş etdirəcək. Buna görə də mübarək Qədir-Xum bayrağının qaldırılması mərasimi görünməmiş şəkildə genişləndirilib. Belə ki, əvvəlki illərdə təxminən 90 məkanda keçirilən bu mərasim bu il İraq daxilində və xaricində 150-yə yaxın rəsmi məkanda baş tutacaq və 128 ölkəni əhatə edəcək.
O davam edərək deyib: İlk dəfə olaraq Qədir-Xum bayraqları təcavüzkar hücum və bombardmanlara məruz qalmış İranın 20 vilayətində qaldırılacaq. Bu addım Müqəddəs imam Əli (ə) hərəminin İran xalqına dəstək məqsədilə həyata keçirdiyi humanitar kampaniya çərçivəsində və ali dini mərcəiyyətin çağırışına cavab olaraq atılır. Bu bayraqlar həmin bölgələrdə baş vermiş hücumlar qarşısında həmrəylik, müqavimət və ümid mesajı daşıyacaq.
Media şöbəsinin müdiri imam Əli (ə) hərəmində həzrət Fatimə (s.ə) həyətində yerləşən həzrət Aminə salonunda keçirilən konfransın davamında qeyd edib ki, proqramlar möminlərin hissləri nəzərə alınaraq hazırlanacaq və bölgə xalqlarının kədər və həmrəylik ruhuna uyğun olacaq. Bununla yanaşı, Qədir-Xum bayramı birlik, dözümlülük və maarifçilik dəyərlərini xatırladan böyük etiqadi hadisə kimi qeyd ediləcək.
Qədir-Xum Beynəlxalq Həftəsinin tədbirləri Zilhiccə ayının 15-dən başlayacaq və müqəddəs imam Əli (ə) hərəmində Qədir-Xum bayrağının qaldırılması mərasimi, Qurani-Kərim proqramları, mədəni və ictimai tədbirlər, xanımlar üçün xüsusi proqramlar, uşaq və yeniyetmələrə həsr olunmuş layihələr, irs və nadir eksponatlar sərgiləri, sosial yardım təşəbbüsləri, eləcə də Qədir-Xum bayramı münasibətilə Nəcəf Əşrəfə gələn milyonlarla zəvvarın qarşılanması üçün xidmət və təşkilati proqramları əhatə edəcək.
