İmam Əli (ə) hərəmi şagirdlər üçün nəzərdə tutulmuş yay təlim kursları proqramını başa çatdırıb.
İmam Əli (ə) hərəmi İraqın müxtəlif vilayətlərindən 2 900-dən çox şagirdin iştirakı ilə təşkil etdiyi yay təlim-tərbiyə kursları proqramını başa çatdırıb. «Əlidən (ə) öyrənirik» şüarı ilə keçirilən bu proqram 11–17 yaş aralığında olan şagirdləri əhatə edib.
İmam Əli (ə) hərəminin Dini İşlər Bölməsinin rəhbəri Şeyx Kərar əl-Xəfaci xəbər mərkəzinə açıqlamasında bildirib: «İmam Əli (ə) hərəminin Dini Təbliğat Birliyi yay kursları proqramının yekun mərasimini Həzrət Fatimənin (s.ə) həyətində yerləşən Möhsin zalında təşkil edib. Mərasimdə şagirdlər, onların valideynləri və kurslarda iştirak edən müəllimlər iştirak ediblər. Bu kurslar Nəcəf şəhərinin məscid və hüseyniyyələrində keçirilib».
O əlavə edib: «Bu kurslar Nəcəf Elmi Hövzəsinin bir qrup müəllim və ruhanisinin nəzarəti altında keçirilib. Proqram çərçivəsində əxlaq, fiqh və Əhli-beyt (ə) elmləri ilə bağlı dərslər tədris olunub. Həmçinin kurs iştirakçılarına Qurani-Kərim, İslam Peyğəmbərinin (s) və onun pak Əhli-beytinin (ə) həyatı və sirəsi haqqında təlimlər verilib».
O qeyd edib: «Bu kurslar məktəblərin yay tətili günlərində davam edib və şagirdlərin dini və əxlaqi maarifləndirilməsini gücləndirmək məqsədi daşıyıb. Yekun mərasimdə kursların keçirilməsində göstərdikləri səylərə və iştiraklarına görə müəllimlərə, eləcə də fərqlənən və yüksək nəticə göstərən şagirdlərə təşəkkür və mükafatlar təqdim olunub».
Kursların müəllimləri və şagirdlərin ailələri də belə təlim-tərbiyə proqramlarının təşkili ilə şagirdlərə göstərdiyi diqqətə görə İmam Əli (ə) hərəminin rəhbərliyinə təşəkkürlərini bildiriblər. Onlar bu proqramların Qurani-Kərimin təlimlərinin yeniyetmə nəslin düşüncəsində və həyatında möhkəmləndirilməsində, eləcə də onların Əhli-beytin (ə) sirəsi ilə tanış edilməsində mühüm rol oynadığını vurğulayıblar.
Qeyd edək ki, bu kurslar İmam Əli (ə) hərəminin yeniyetmə nəslin dini və əxlaqi maarifləndirilməsinin gücləndirilməsi, onların azdırıcı fikirlərdən qorunması və İslam dəyərlərinin həyatlarında möhkəmləndirilməsi istiqamətində göstərdiyi səylər çərçivəsində təşkil olunub.
