“İrs” III Beynəlxalq Konfransının elmi komitəsinin ilk iclası İmam Əli (ə) hərəminin təşkilatçılığı ilə keçirilib.
“İrs” III Beynəlxalq Konfransının keçirilməsinə məsul olan elmi komitə ilk iclasını keçirib. İclasda konfrans çərçivəsində araşdırılması və tədqiq edilməsi nəzərdə tutulan hicri-qəməri XIV əsrin ilk yarısında yaşamış görkəmli dini şəxsiyyətlərin seçilməsi məsələsi müzakirə olunub.
Bununla yanaşı, həmin şəxsiyyətlərin elmi və intellektual irsinin müxtəlif aspektlərinin araşdırılması, onların mədəni fəaliyyətlərindən və elmi əsərlərindən bəhrələnilməsi də iclasın əsas müzakirə mövzularından olub. İclas İmam Əli (ə) hərəminin Fikir və Mədəniyyət İşləri üzrə müavinliyinin iclas zalında keçirilib.
İmam Əli (ə) hərəminin Fikir və Mədəniyyət İşləri üzrə müavinliyinə bağlı Ələvi Tədqiqatlar və İslam Araşdırmaları Məclisinin sədri Şeyx Salam ən-Nasiri xəbər mərkəzinə açıqlamasında bildirib:
“Bu konfrans məzhəb alimləri arasından görkəmli şəxsiyyətlərin tanıdılması və araşdırılmasına həsr olunub. Məqsəd onların həyat və fəaliyyətini diqqətə çatdırmaq, elmi və intellektual irsindən bəhrələnməkdir. Bu istiqamətdə hicri-qəməri XIV əsrin ilk yarısında yaşamış bir sıra alimlər, o cümlədən Axund Xorasani (r) və Seyid Əbülhəsən İsfahani (r) seçilib.”
O əlavə edib:
“Konfrans gələn ilin may ayının ortalarında, Ümumdünya İrs Günü ilə eyni vaxtda keçiriləcək. Konfrans ‘1329–1365-ci hicri illərdə Nəcəfi-əşrəf fəqihləri: elmi inkişaf yolu, fiqhi metod və sivilizasion təsir’ adı altında təşkil olunacaq. Konfransın şüarı isə ‘Nəcəfi-əşrəf; fiqhin beşiyi və irsin qoruyucusu’ olacaq.”
O, həmçinin qeyd edib ki, bu konfrans İmam Əli (ə) hərəminin hər il həyata keçirdiyi tədbir kimi Ümumdünya İrs Təşkilatında qeydiyyata alınacaq.
Qeyd edək ki, elmi komitə məqalələrin xülasələrinin qəbul edilməsi üçün 1405-ci il, 13 Dey tarixini son müraciət müddəti kimi müəyyənləşdirib. Konfransla bağlı UNESCO ilə də lazımi koordinasiya işləri aparılıb.
