Həzrət Məhəmməd Əminin (səlləllahu əleyhi və alihi və səlləm) və Həzrət İmam Cəfər Sadiqin (əleyhis-səlam) səadətli mövludları münasibəti ilə Həzrət Höccəti (əccələllahu təəala fərəcəhüş-şərif) və siz əzizləri səmimi qəlbdən təbrik edir, ən xoş arzularımızı çatdırırıq.
İslamın möhtərəm Peyğəmbərinin (s) mövludu
Şiə alimlərinin nəzərinə görə, Rəbiül-əvvəl ayının 17-si, cümə günü sübh çağı Məkkəyi-Mükərrəmədə peyğəmbərlərin ağası Həzrət Məhəmməd Mustafanın (səlləllahu əleyhi və alihi və səlləm) mübarək mövludu baş vermişdir. Onun mövludu ədalətli Ənuşirəvanın padşahlığı dövrünə təsadüf etmiş və həmin ildə Fil əshabı həlak olmuşdur.
Həzrətin adı Məhəmməd (s), künyəsi isə Əbül-Qasimdir. Atasının adı Abdullah, anasının adı isə Amənə bint Vəhəb olmuşdur.
Həzrət dünyaya gələn zaman onun mübarək alnından nur saçılır, özündən müşk ətri yayılırdı. Həmin gecə Hicaz tərəfindən bir nur parladı və bütün aləmə yayıldı. Padşahların taxtları aşdı və onların hamısı həmin gün lal oldular, danışa bilmədilər.
Həzrətin mövludu zamanı müqərrəb mələklər və peyğəmbərlərin seçilmiş ruhları hazır oldular. Cənnətin xəzinədarı Rzvan hurilərlə birlikdə nazil oldu. Cənnətdən qızıl, gümüş və zümrüddən hazırlanmış kuzə və ləyənlər gətirdilər. Həmçinin Həzrət Amənə üçün cənnətdən şərbətlər gətirdilər və o, həmin şərbətlərdən içdi.
Həzrət doğulduqdan sonra onu cənnət suları ilə qüsl etdilər və Firdovs ətirləri ilə ətirləndirdilər.
Həzrətin mövludunun möcüzələri
Həzrətin mövlud etdiyi gün dünyanın hər yerində mövcud olan bütlər üzüstə yerə yıxıldı. Kisranın eyvanının on dörd bürcü uçub dağıldı. İnsanların sitayiş etdiyi Savə gölü quruyaraq şoranlığa çevrildi. Uzun illər ərzində heç kimin orada su görmədiyi Savə vadisində su axmağa başladı.
Min il ərzində heç vaxt sönməyən Fars atəş məbədi Həzrətin mövlud gecəsində söndü. Kahinlərin elmi və sehrbazların sehri təsirsiz hala gəldi. Kisranın tağı ortadan iki yerə bölündü və onun izləri bu günə qədər görünməkdədir.
Həzrətin mövludu zamanı göydən bu nida eşidildi:
وَجَاءَ الْحَقُّ وَزَهَقَ الْبَاطِلُ ۚ إِنَّ الْبَاطِلَ كَانَ زَهُوقًا
“Haqq gəldi və batil yox oldu. Həqiqətən, batil yox olmağa məhkumdur.”
(İsra surəsi, 81-ci ayə)
Həzrətin xüsusiyyətləri
Heç vaxt milçək o Həzrətin mübarək bədəninə qonmazdı. Mübarək gözləri yuxuda olsa belə, qəlbi oyaq olar, görər və eşidərdi. Həzrət arxasında baş verənləri də önündə olanları gördüyü kimi aydın şəkildə görərdi.
Hansı heyvana minərdisə, həmin heyvan heç vaxt qocalıb arıqlamazdı. Həzrətin Yəfur adlı bir ulağı var idi. Həzrət ona “filan şəxsi yanıma gətir” deyə əmr etdikdə, ulağın həmin şəxsin evinə getdiyi, başını qapıya vurduğu və öz işarəsi ilə onu Həzrətin hüzuruna gətirdiyi nəql olunur.
Peyğəmbərin (s) mövludunun xüsusiyyətlərindən biri də sünnətli, göbəyi kəsilmiş və qan və digər çirklərdən pak halda dünyaya gəlməsi idi. Həmçinin doğulduğu zaman başı ilə deyil, ayaqları ilə dünyaya gəldiyi nəql edilir. Mövlud anında üzü qibləyə — Kəbəyə tərəf səcdəyə düşdü. Səcdədən başını qaldırdıqdan sonra əllərini göyə qaldıraraq Allahın təkliyinə və özünün Allahın Rəsulu olduğuna şəhadət verdi. Ardınca Həzrətin vücudundan elə bir nur saçıldı ki, dünyanın şərqini və qərbini işıqlandırdı.
Həzrətin möcüzələri
Peyğəmbərin (s) çoxsaylı möcüzələri olmuşdur. Onlardan bəziləri bunlardır:
- Həzrətin duası ilə ölülərin dirilməsi, korların görməsi və xəstələrin şəfa tapması.
- Həzrətin heyvanlarla danışması.
- Bütün dilləri bilməsi və onların hamısında danışmaq qüdrətinə malik olması.
- Mübarək kürəyində nübüvvət möhürünün olması və onun nurunun günəş işığından daha parlaq olması.
- Mübarək barmaqlarının arasından su axması və bir dəstə insanın həmin sudan doyunca içməsi.
- Mübarək əlindəki çınqıl daşlarının təsbeh deməsi və insanların bunu eşitməsi.
- Mübarək vücudunun günəş altında kölgəsinin olmaması.
- Mübarək ağız suyunu bir quyuya tökdükdə həmin quyuda bərəkət yaranması və suyun artması. Həmçinin ağız suyunu hər hansı xəstəliyi olan şəxsin yarasına və ya ağrıyan yerinə sürtdükdə şəfa tapması.
- Mübarək əli hər hansı yeməyə toxunduqda ona bərəkət gəlməsi və az miqdarda yeməklə çoxsaylı insanların doyurulması.
- Yumşaq torpaqda yeridikdə ayaq izlərinin qalmaması, sərt daşın üzərində yeridikdə isə mübarək ayaq izlərinin daşda qalması.
İmam Cəfər Sadiqin (ə) mövludu
Hicri 83-cü ilin Rəbiül-əvvəl ayının 17-də İmam Cəfər Sadiqin (ə) mübarək mövludu Mədineyi-Münəvvərədə baş vermişdir.
Həzrətin mübarək adı Cəfər, şərəfli künyəsi Əbu Abdullah, nurani ləqəbi isə əs-Sadiqdir. Möhtərəm atası İmam Məhəmməd Baqir (ə), əziz anası isə Ümmü Fərvə xanım olmuşdur. İmam Sadiq (ə) anası haqqında belə buyurmuşdur:
“Anam imanlı, təqvalı və xeyirxah qadınlardan idi. Allah xeyirxahları sevir.”
İmam Sadiqin (ə) yeddi oğlu və üç qızı olmuşdur. Onların adları bunlardır: İmam Musa Kazim (ə), İsmayıl, Abdullah, Məhəmməd Dibaç, İshaq, Əli Ürezi, Abbas, Ümmü Fərvə, Əsma və Fatimə.
Həzrətin zahiri görkəmi haqqında nəql edilmişdir ki, orta boylu, nurani və açıq çöhrəli, ağ bədənli, uzunburun idi. Saçları qara və buruq, yanağında isə qara xal var idi.
Bərəkətli 17 Rəbiül-əvvəl gününün əməlləri
Bu gün şərəfli və bərəkətli bir gündür. Qədim zamanlardan Əhli-beyt (ə) nəslindən olan saleh insanlar bu günün ehtiramını qorumuş, haqqını yerinə yetirmiş və oruc tutmuşlar.
17 Rəbiül-əvvəl günü oruc tutan şəxsə Allah-Təala bir illik orucun savabını bəxş edər.
Bu gündə sədəqə vermək, müqəddəs ziyarətgahları ziyarət etmək, xeyirxah əməllər görmək və möminləri sevindirmək müstəhəbdir.
