İmam Əli (ə) hərəmi zəvvarlara pulsuz nəqliyyat xidməti göstərmək məqsədilə kondisionerlə təchiz olunmuş 200-dən çox avtomobili xidmətə cəlb edib.
İmam Əli (ə) hərəmi vahid nəqliyyat şəbəkəsi yaratmaqla zəvvarların həzrət Əmirəlmöminin Əlinin (ə) müqəddəs hərəminə daşınmasını və daha sonra onların Kərbəlayi-Müəllaya yola salınmasını asanlaşdırıb. Bu addım zəvvarların rahat hərəkətini təmin etmək və müxtəlif marşrutlarda sıxlığın azaldılması məqsədilə həyata keçirilir.
İmam Əli (ə) hərəminin Nəqliyyat Bölməsinin məsulu Səbah Ət-Tərfi Xəbər Mərkəzinə bildirib:
“Nəqliyyat Bölməsi Ərbəin üçün nəzərdə tutulan xüsusi planı tam nəqliyyat parkını səfərbər etməklə həyata keçirməyə başlayıb və zəvvarlara əsas marşrutlar üzrə pulsuz nəqliyyat xidmətləri göstərir.”
O əlavə edib:
“Bu plana əsasən, zəvvarlar şəhərin qədim hissəsinin girişlərindən imam Əli (ə) hərəminə və əks istiqamətdə pulsuz daşınırlar. Bundan əlavə, eskalatorların fəaliyyətini dəstəkləmək və onların ətrafındakı sıxlığı azaltmaq məqsədilə ən azı 9 nəqliyyat vasitəsi ayrılıb ki, bu da zəvvarların gediş-gəlişini daha rahat edir.”
Səbah Ət-Tərfi həmçinin vurğulayıb:
“İmam Əli (ə) hərəmi zəvvarlara xidmət göstərmək üçün kondisioner və rahatlıq avadanlıqları ilə təchiz olunmuş 200-dən çox avtomobili xidmətə cəlb edib. Bu avtomobillər zəvvarları Nəcəf–Kərbəla yolundakı 660-cı dirəkdən cənub dayanacağına daşıyır. Eyni zamanda, onlar zəvvarların geri dönüşünün nizamlı şəkildə təşkilini nəzərdə tutan xüsusi planın icrasında da iştirak edirlər. Bu tədbirlər zəvvarların hərəkətini daha rahat və səmərəli edir, Ərbəin zəvvarlarına göstərilən xidmətlərin keyfiyyətini yüksəldir.”
Qeyd edək ki, İmam Əli (ə) hərəmi bütün bölmə və imkanlarını səfərbər edərək Ərbəin zəvvarlarına xidmət göstərməkdə davam edir. Bu zəvvarlar möhtəşəm Ərbəin mərasimində iştirak etmək üçün Kərbəlayi-Müəllaya doğru yola çıxarkən, Nəcəfi-Əşrəfdə yerləşən həzrət Əmirəlmöminin Əli (ə) hərəmini öz mənəvi səfərlərinin ən mühüm dayanacaqlarından biri kimi ziyarət edirlər.
