İmam Əli (ə) hərəminin Qadın İşləri bölməsi Ərbəin zəvvarlarından olan milyonlarla qadını qarşılamaq üçün xüsusi xidmət proqramının icrasına başlayıb.
İmam Əli (ə) hərəminin Qadın İşləri bölməsi Hüseyni Ərbəin günləri üçün xüsusi xidmət proqramını həyata keçirməyə başlayıb. Bu proqram çərçivəsində milyonlarla qadın zəvvara xidmət göstərilməklə yanaşı, onların İmam Əli (ə) hərəminə giriş-çıxış və hərəkət istiqamətləri nizamlı və rahat şəkildə idarə olunacaq.
İmam Əli (ə) hərəminin Qadın İşləri bölməsinin rəhbəri xanım Rəmle əl-Xəzai hərəmin xəbər mərkəzinə verdiyi müsahibədə bildirib: «Bu proqram çərçivəsində milyonlarla qadın zəvvarın yerləşdirilməsi və qəbulu üçün Həzrət Fatimə (s.ə.) həyətində dörd böyük salon hazırlanıb.
Həmçinin İmam Əli (ə) hərəminin ətrafında və İmam Rza (ə) şəhərciyində dörd istirahət məntəqəsi təchiz edilib. Nəcəf şəhərinin qədim hissəsində və hərəmin tabeliyində olan digər məkanlarda 14 sanitar qovşağı da istifadəyə hazır vəziyyətə gətirilib».
O əlavə edib: «Bu proqram çərçivəsində qadın zəvvarların daha asan şəkildə daxil olub-çıxmaları üçün dəqiq plan əsasında yeni yollar və girişlər nəzərdə tutulub.
Bundan əlavə, qabaqcıl təhlükəsizlik sistemindən istifadə etməklə və izdihamın idarə olunması üzrə ixtisaslaşmış komandanın nəzarəti altında zəvvarların hərəkətinin rahat və nizamlı şəkildə tənzimlənməsi üçün xüsusi proqram həyata keçirilir. İraqın daxilindən və xaricindən 700-dən çox qadın könüllü xidmətçi bu proqramın icrasında iştirak edir».
Qeyd edək ki, İmam Əli (ə) hərəmi bütün bölmələrini səfərbər edərək Hüseyni Ərbəin zəvvarlarına xidmət göstərir.
Bu zəvvarlar müqəddəs Kərbəlaya doğru yola düşərək möhtəşəm Ərbəin mərasimində iştirak etməzdən əvvəl Nəcəfi-Əşrəfdə yerləşən İmam Əli (ə) hərəmini ziyarət marşrutlarının ən mühüm dayanacaqlarından biri kimi seçirlər.
