İmam Əli (ə) hərəmi “Hidayət Yolu Qızları” adlı tələbə mədəni qrupunu qəbul edib.
İmam Əli (ə) hərəminin İctimai Əlaqələr şöbəsi Nəcəf-Əşrəf və Babil vilayətlərinin müxtəlif humanitar və təbiət elmləri ixtisaslarında təhsil alan tələbə qızlardan ibarət “Hidayət Yolu Qızları” mədəni qrupunun nümayəndə heyətini qəbul edib.
Nümayəndə heyətinin səfəri tələbə qızların dini-mənəvi maarif səviyyəsinin yüksəldilməsi və onların İslamın əsl dəyərləri ilə bağlılığının möhkəmləndirilməsi məqsədilə təşkil olunmuş fikir, mədəniyyət və dini proqram çərçivəsində həyata keçirilib.
Maarifləndirici görüşlər
Proqram çərçivəsində iki maarifləndirici görüş keçirilib. Birinci görüşdə Seyid Mürtəza Şərəfuddin imam Hüseynin (ə) qiyamından, onun etiqadi və bəşəri baxımdan əbədi əhəmiyyət daşıyan cəhətlərindən bəhs edib.
Şeyx Həsən Cavadi isə çıxışında müasir dövrdə ailə və cəmiyyətlə bağlı bir sıra aktual məsələləri araşdıraraq, onların həlli yollarını İslam təlimləri əsasında izah edib.
Hər iki görüş iştirakçılar tərəfindən böyük maraqla qarşılanıb. Tələbələr suallar verməklə, öz fikirlərini bölüşməklə və müzakirələrdə fəal iştirak etməklə elmi və praktik baxımdan proqramın səmərəliliyinin artmasına töhfə veriblər.
Məqsədyönlü mədəni proqramlar
İmam Əli (ə) hərəmi daim gənclər üçün təşkil olunan mədəni və maarifləndirici təşəbbüsləri dəstəkləyir. Bu proqramlar gənclərdə yüksək mənəvi şüur, məsuliyyət hissi formalaşdırmaq, onların Əhli-beyt (ə) məktəbi və bu məktəbin ali insani, islahatçı dəyərləri ilə dərin bağlılığını gücləndirmək məqsədi daşıyır.
“Hidayət Yolu Qızları” mədəni qrupunun rəhbəri Zəhra Hüsam bildirib:
“Qrupumuz tələbələr və məzunlar üçün fikir və mədəniyyət yönümlü proqramlar hazırlayıb həyata keçirməklə dini və intellektual maarifin gücləndirilməsini, eləcə də universitet mühitində əxlaqi dəyərlərin möhkəmləndirilməsini qarşıya məqsəd qoyub.”
O əlavə edib:
“İmam Əli (ə) hərəminin bu proqrama ev sahibliyi etməsi elm və mənəviyyatın vəhdətini əks etdirən zəngin bir mühit yaratdı. Bu da iştirakçıların Əhli-beytin (ə) həyatı, məktəbi və islahatçı irsi ilə əlaqələrinin daha da dərinləşməsinə səbəb oldu.”
Proqram iştirakçıların Əmirəlmöminin həzrət Əlinin (ə) müqəddəs hərəmini ziyarət etmələri və Həzrətin qonaq evində təşkil olunan qonaqlıqda iştirak etmələri ilə başa çatıb. Bu, proqramın mədəni və mənəvi tərəflərini bir-biri ilə tamamlayaraq iştirakçıların yaddaşında və qəlbində silinməz, dəyərli xatirə kimi qalıb.
