İmam Əli (ə) hərəmi Yaxın Şərq və Şimali Afrika regionu üzrə Beynəlxalq Kitabxana Assosiasiyaları və İnstitutları Federasiyasının (IFLA) Regional Komitəsinin ilk əyani toplantısında İraqı təmsil edərək iştirak edib.
İmam Əli (ə) hərəmi İdeoloji və Mədəni İşlər şöbəsinə tabe olan Rövzeyi Heydəriyyə Kitabxanasını təmsil edərək Yaxın Şərq və Şimali Afrika regionu üzrə Beynəlxalq Kitabxana Assosiasiyaları və İnstitutları Federasiyasının Regional Komitəsinin ilk əyani toplantısında iştirak edib.
Toplantı Səudiyyə Ərəbistanının Zəhran şəhərində, Kral Əbdüləziz Dünya Mədəniyyət Mərkəzi «İsra»nın ev sahibliyi ilə keçirilib.
Rövzeyi Heydəriyyə Kitabxanasının məsul şəxsi Kərar əl-Həllu 2025–2027-ci illər seçki dövrü üçün Regional Komitədə İraq Respublikasını təmsil edib.
O, Beynəlxalq Kitabxana Assosiasiyaları və İnstitutları Federasiyasının (IFLA) seçkilərində İraq nümayəndəsi olaraq yer qazandıqdan sonra bu vəzifəni üzərinə götürüb.
Kərar əl-Həllu xəbər mərkəzinə açıqlamasında bildirib: «Bu iştirak Rövzeyi Heydəriyyə Kitabxanasının beynəlxalq peşəkar dairələrdə mövqeyinin gücləndirilməsi, kitabxanaçılıq və informasiya sahəsində İraqı və Nəcəfi-Əşrəfi təmsil etmək, kitabxanaçılıq fəaliyyətini dəstəkləyən layihələrin və əməkdaşlıqların inkişafında iştirak etmək, elmi və sənəd irsini qorumaq, həmçinin mədəni və rəqəmsal transformasiyanı dəstəkləmək məqsədi daşıyır».
O, həmçinin qeyd edib: «Rövzeyi Heydəriyyə Kitabxanası komitənin təsdiqlədiyi səkkiz layihə və təşəbbüsdən üçünə rəhbərlik edir. Bununla yanaşı, bir sıra digər layihələrdə də üzv və iştirakçı kimi fəaliyyət göstərir. Bu da kitabxananın regional kitabxanaçılıq və mədəni fəaliyyət sahəsindəki iştirakını daha da gücləndirir».
O əlavə edib: «Bu toplantıda komitənin regional fəaliyyətinin gedişi, onun proqramı çərçivəsində təsdiqlənmiş layihə və təşəbbüslərin həyata keçirilmə mərhələləri, eləcə də bu layihələrin inkişaf etdirilməsi mexanizmləri müzakirə edildi. Həmçinin əməkdaşlığın gücləndirilməsi, təcrübə mübadiləsi və region ölkələrinin kitabxana və informasiya qurumları arasında tərəfdaşlıqların yaradılması yolları nəzərdən keçirildi».
Rövzeyi Heydəriyyə Kitabxanasının məsul şəxsi bildirib: «İmam Əli (ə) hərəminin nümayəndə heyəti üçün hazırlanan proqram çərçivəsində “İsra” Mərkəzinin bir sıra bölmələrinə ziyarət təşkil edildi. Bu səfər zamanı mərkəzin elm, mədəniyyət, innovasiya və mütaliə sahələrindəki fəaliyyəti ilə tanışlıq, təcrübə mübadiləsi və mədəniyyət və kitabxana qurumları arasında əməkdaşlıq imkanlarının araşdırılması həyata keçirildi».
