“Həzrət Məhəməd və imam Sadiq (ə)” V Beynəlxalq Həftəsinin proqramları İmam Əli (ə) hərəminin müqəddəs məkanında mövlud bayrağının ucaldılması mərasimi ilə başlayıb.
İmam Əli (ə) hərəminin İctimaiyyətlə Əlaqələr bölməsi “Həzrət Məhəməd və imam Sadiq (ə)” V Beynəlxalq Həftəsinin proqramlarının başladığını bildirib. Həzrət Məhəmmədin (sallallahu əleyhi və alih) və onun əziz nəvəsi İmam Cəfər Sadiqin (əleyhis-salam) mübarək mövludları münasibətilə təşkil olunan bu proqramlar İmam Əli (ə) hərəminin müqəddəs məkanında mövlud bayrağının təntənəli şəkildə ucaldılması mərasimi ilə başlayıb. Mərasim böyük sevinc və şadlıq əhval-ruhiyyəsi ilə keçirilib.
Daxili Əlaqələr bölməsinin rəhbəri Kərar Şani xəbər mərkəzinə verdiyi açıqlamada bildirib: “Bu həftə ərzində İraq daxilində və xaricində keçiriləcək genişmiqyaslı mədəni, dini və ictimai proqramlar, eləcə də festivallar təşkil olunacaq.”
O əlavə edib: “Bu həftənin ən mühüm proqramlarından biri XV Peyğəmbər Əkrəm Poeziya Festivalıdır. Festivalda beynəlxalq səviyyədə tanınmış çoxsaylı şairlər və müxtəlif ərəb ölkələrinin ən tanınmış şairlərindən bir qrupu iştirak edəcək.
Həmçinin Əhli-beytin həyat yolunun təbliği, bu həyat yolu haqqında məlumatlılığın dərinləşdirilməsi, onun insani və dini aspektlərinin dünyanın müxtəlif yerlərindən gələn zəvvarlara tanıdılması məqsədilə Qurani və mədəni proqramlar keçiriləcək.”
İmam Əli (ə) hərəmi “Həzrət Məhəməd və imam Sadiq (ə)” Həftəsinin beşinci mərhələsində bu böyük İslam hadisəsini ən möhtəşəm və layiqli şəkildə keçirməyə çalışır. Bu tədbirlərin cəmiyyətin bütün təbəqələri arasında dini və mədəni maarifləndirmənin gücləndirilməsinə töhfə verməsi nəzərdə tutulur.
