İmam Əli (ə) hərəminin nəzdində fəaliyyət göstərən imam Hüseyn (ə) qonaq evi Ərbəin günlərində hər gün zəvvarlara 50 minə qədər yemək təqdim edir.
İmam Əli (ə) hərəminin Qonaq Evi və Qonaqpərvərlik şöbəsi Ərbəin üçün hazırlanmış kompleks xidmət planı çərçivəsində Həzrət Ümmül-Bənin (s.ə.) həyətində yerləşən İmam Hüseyn (ə) qonaq evi vasitəsilə Ərbəin zəvvarlarına qida xidmətləri göstərir.
Bu iaşə mərkəzinin məsulu Fazil Xələf İmam Əli (ə) hərəminin Xəbər Mərkəzinə bildirib:
“Bu mərkəz hər gün təxminən 30 min yemək paylayır. İmam Əli (ə) hərəminə gələn zəvvarların sayı artdıqda isə bəzi günlərdə bu rəqəm 50 min yeməyə çatır. Bundan əlavə, zəvvarlara minlərlə əlavə qonaqlıq payı da təqdim edilir.”
O əlavə edib:
“Qonaqpərvərlik planı Səfər ayının 7-dən başlayıb və Ərbəin günlərinin sonunadək davam edəcək. Bu müddətdə zəvvarlara hər gün üç dəfə yemək verilir.”
Fazil Xələf qeyd edib ki, bu xidmətlər 70-dən çox xidmətçi və könüllü tərəfindən, yeməklərin hazırlanması və paylanmasını əhatə edən nizamlı proqram əsasında həyata keçirilir.
Qeyd edək ki, İmam Əli (ə) hərəmi Əmirəlmöminin İmam Əlinin (ə) zəvvarlarını qəbul etmək məqsədilə Ərbəin günləri üçün genişmiqyaslı xidmət planı hazırlayıb. Bu plana əsasən, zəvvarların əsas hərəkət marşrutları boyunca 18 qonaqlıq və iaşə mərkəzi yaradılıb və tam təchiz edilib ki, milyonlarla zəvvarın Nəcəf Əşrəfdə rahat şəkildə qəbul olunmasına və onlara xidmət göstərilməsinə şərait yaradılsın.
