İmam Əli (ə) hərəminin Qadınlar İşləri Bölməsi Ərbəin günlərində xanım zəvvarların sayının artması ilə əlaqədar camaat namazı üçün ayrılmış məkanların sayını artırıb.
İmam Əli (ə) hərəminin Qadınlar İşləri Bölməsi xidmət və icra proqramı çərçivəsində Ərbəin günlərində xanımlar üçün nəzərdə tutulmuş üçüncü camaat namazı məkanının istifadəyə verildiyini elan edib.
Bu addım həzrət Əmirəlmöminin Əlinin (ə) müqəddəs hərəmini ziyarət etmək üçün Nəcəf-Əşrəfə gələn xanım zəvvarların sayının artmasına uyğun olaraq həyata keçirilib.
İmam Əli (ə) hərəminin Qadınlar İşləri Bölməsinin rəhbəri Rəmlə əl-Xuzai hərəmin Xəbər Mərkəzinə bildirib:
“Bu yeni məkanın istifadəyə verilməsi milyonlarla zəvvarın qarşılanması üçün bölməmiz tərəfindən hazırlanmış xidmət və təşkilati tədbirlər paketinin bir hissəsidir.”
O əlavə edib:
“Qadınlar İşləri Bölməsi camaat namazının rahat şəkildə qılınması üçün münasib məkanların hazırlanmasına xüsusi diqqət yetirib və bu ilahi ibadətin nizamlı şəkildə keçirilməsi üçün bütün lazımi imkan və şəraiti təmin edib.”
Əl-Xuzai həmçinin qeyd edib ki, xanımlar üçün camaat namazı Heydəri, Rüqəyyə (s.ə) və Möhsin (ə) həyətində təşkil olunur. Bu tədbir Ərbəin mövsümündə xanım zəvvarların sayının davamlı artmasına uyğun olaraq həyata keçirilib.
Məlumata görə, bu layihə çərçivəsində camaat namazının keçirilməsinə nəzarət etmək üçün ixtisaslaşmış və vahid qadın heyəti formalaşdırılıb. Heyət zəvvarların hərəkətini nizamlayır, gediş-gəlişi asanlaşdırır, ibadət üçün münasib mənəvi mühit yaradır və xanım zəvvarlara səliqəli, mütəşəkkil xidmət göstərilməsini təmin edir.
