İmam Əli (ə) hərəminin rəhbəri Seyid İsa əl-Xərsan nəqliyyat mərkəzlərinə baş çəkərək Ərbəin zəvvarlarının geri qayıdış prosesinə və onlara göstərilən xidmətlərə yerində nəzarət edib.
İmam Əli (ə) hərəminin rəhbəri Seyid İsa əl-Xərsan Heydəriyyə bölgəsində zəvvarların geri dönüş planının icra olunduğu məntəqələrdə olub, xidmətlərin göstərilməsi prosesini yerində izləyib. Səfərin məqsədi Ərbəin mərasimlərində iştirak etmiş zəvvarların geri qayıdışı zamanı təqdim olunan xidmətlərin keyfiyyətini və işlərin gedişini qiymətləndirmək olub.
Yerində nəzarət
İmam Əli (ə) hərəminin Himayəçilər Şurasının üzvü Heydər əl-İsavı da hərəm rəhbərini müşayiət edərək zəvvarların daşınması, logistika və texniki təminat xidmətlərinin gedişi ilə tanış olub. Onlar müxtəlif şöbə və bölmələrin məsul şəxsləri, eləcə də hərəmin xidmətçiləri ilə görüşüb, planın icra mexanizmi və əməliyyatın idarə olunması üçün görülən təşkilati tədbirlər barədə ətraflı məlumat alıblar.
Xidmətlərin davamlılığına xüsusi diqqət
Seyid İsa əl-Xərsan səfər zamanı vurğulayıb ki, Ərbəin günlərinin sonunadək zəvvarlara ən yüksək səviyyədə xidmət göstərilməsi davam etdirilməlidir. O, zəvvarların rahatlığının və təhlükəsizliyinin təmin olunması, həmçinin onların geri dönüşünün asanlaşdırılması üçün bütün xidmət sahələrinin koordinasiyalı və səmərəli fəaliyyət göstərməsinin vacibliyini qeyd edib.
Qeyd edək ki, İmam Əli (ə) hərəmi zəvvarların geri dönüşü üçün xüsusi plan həyata keçirir. Bu çərçivədə iri və kiçik avtobuslardan ibarət nəqliyyat parkı hazırlanaraq zəvvarların Heydəriyyə bölgəsindən Nəcəf Əşrəf şəhərinin cənub sərnişin terminalına daşınması təmin edilir. Bundan əlavə, zəvvarların istifadəsi üçün istirahət məkanları, isti yeməklər, sərin içməli su, eləcə də tibbi və səhiyyə xidmətləri daxil olmaqla bütün zəruri imkanlar yaradılıb.
