İmam Əli (ə) hərəminin İtkin Zəvvarlara Yardım Mərkəzi 400-dən çox könüllü xidmətçinin iştirakı ilə bütün imkanlarını Ərbəin zəvvarlarına xidmət göstərməyə səfərbər edib.
İmam Hüseynin (ə) Ərbəin ziyarəti günləri üçün hazırlanmış xidmət proqramı çərçivəsində İmam Əli (ə) hərəmi, müasir elektron sistemdən və bir neçə xidmət məntəqəsindən istifadə etməklə İtkin Zəvvarlara Yardım Mərkəzinin fəaliyyətini genişləndirib. Məqsəd itkin düşən zəvvarların tez bir zamanda tapılması və onlara gecə-gündüz xidmət göstərilməsidir.
Kompleks xidmət proqramı
Mərkəzin məsulu Mustafa Cəbbar bildirib ki, bu mərkəz xüsusi xidmət proqramının icrasına xeyli əvvəl başlayıb və dörd əsas xidmət məntəqəsi yaradıb.
Bu məntəqələr bunlardır:
- Əs-Səqayə məscidinin yaxınlığında yerləşən əsas mərkəz;
- Həzrət Fatimə (s.ə.) həyətində fəaliyyət göstərən xidmət məntəqəsi;
- “Əl-Huli” bölgəsindəki eskalatorların yanında yerləşən məntəqə;
- İmam Rza (ə) şəhərciyində fəaliyyət göstərən xidmət məntəqəsi.
O əlavə edib ki, bütün bu mərkəzlər vahid elektron sistemə qoşulub. Bu sistem məlumatların operativ mübadiləsini və aidiyyəti qurumlarla koordinasiyanı təmin edərək itkin düşən zəvvarlarla bağlı müraciətlərə daha sürətli və dəqiq baxılmasına şərait yaradır.
Zəvvarlara müxtəlif xidmətlər
Mərkəzin məsulu göstərilən xidmətlər barədə deyib:
“Zəvvarlar üçün pulsuz telefon əlaqəsi imkanı yaradılıb. Həmçinin minlərlə bələdçi xəritəsi çap edilərək zəvvarlar arasında paylanılıb ki, onlar İmam Əli (ə) hərəminin ibadət və xidmət məkanlarına daha rahat çata bilsinlər.”
O, həmçinin bildirib ki, itkin düşmüş uşaqlar və yaşlı şəxslər üçün tam təchiz olunmuş xüsusi məkanlar ayrılıb.
“Bu mərkəzlər bütün zəruri imkanlarla təchiz olunub. İtkin düşən şəxslərin məlumatları qeydiyyata alındıqdan sonra elektron şəkildə aidiyyəti qurumlara ötürülür ki, onlar ən qısa müddətdə ailələrinə qovuşdurulsunlar.”
400-dən çox könüllü xidmətçi
Mustafa Cəbbar qeyd edib ki, bu proqram Könüllü Xidmətçilər üzrə Qənbər Mərkəzinin dəstəyi ilə həyata keçirilir. Həmin mərkəz İtkin Zəvvarlara Yardım Mərkəzində fəaliyyət göstərmək üçün 400-dən çox könüllü xidmətçi cəlb edib.
Bu xidmətçilər arasında ərəb, fars və ingilis dillərini bilən əməkdaşlar da var. Onlar müxtəlif ölkələrdən gələn zəvvarlarla rahat ünsiyyət quraraq xidmətlərin daha operativ və yüksək səviyyədə göstərilməsini təmin edirlər.
İtkin Zəvvarlara Yardım Mərkəzləri arasında elektron əlaqə
Mustafa Cəbbar bu il həyata keçirilən mühüm təşkilati yeniliyə də toxunaraq bildirib:
“İnformasiya Texnologiyaları Mərkəzinin əməkdaşlığı ilə zəvvarların hərəkət marşrutu boyunca yerləşən müqəddəs ziyarətgahların İtkin Zəvvarlara Yardım Mərkəzlərinin məlumat bazaları bir-birinə inteqrasiya olunub. Bu addım məlumatların ani mübadiləsinə imkan yaradır, itkin düşən şəxslərin müəyyənləşdirilməsi və ailələrinə təhvil verilməsi müddətini əhəmiyyətli dərəcədə azaldır.”
Qeyd edək ki, İmam Əli (ə) hərəmi bu il də Ərbəin zəvvarlarını qarşılamaq üçün genişmiqyaslı xidmət proqramı hazırlayıb. Proqrama yerləşdirmə və qonaqpərvərlik xidmətləri, nəqliyyat, bələdçilik, müşayiət və müasir texnologiyaların tətbiqi daxildir. Bu proqram milyonlarla Əmirəlmöminin Həzrət Əlinin (ə) zəvvarı üçün Ərbəin ziyarəti günlərində təhlükəsiz, nizamlı və layiqli şərait yaratmaq məqsədilə həyata keçirilir.
