İmam Əli (ə) hərəminin Media bölməsi elektron ekranlar sistemini gücləndirməklə Ərbəin yürüşü mərasimlərinə hazırlaşır.
İmam Əli (ə) hərəminin Media bölməsinə bağlı Elektron ekranlar bölməsi imam Hüseynin (ə) Ərbəin günləri ərəfəsində sistemlərin yenidən qurulması, təmiri və yenilənməsi məqsədilə genişmiqyaslı layihəyə başlayıb.
Bu tədbirlər milyonlarla zəvvara məlumat təqdim etmək, işləri nizamlamaq və xidmət göstərmək məqsədilə həyata keçirilir.
Elektron ekranlar bölməsinin məsulu Əbdülmehdi Həsən hərəmin xəbər mərkəzinə açıqlamasında bildirib: «Bu bölmə bir müddət əvvəl zəvvarların hərəkət marşrutlarına uyğun olaraq strateji məntəqələrdə elektron ekranların yenidən qurulması, təmiri, yerləşdirilməsi və quraşdırılması işlərinə başlayıb».
O əlavə edib: «Bu tədbirlər Ərbəin günləri üçün elektron ekranlar sisteminin tam hazır vəziyyətə gətirilməsi məqsədilə əvvəlcədən hazırlanmış media və texniki proqram əsasında həyata keçirilir».
Zəvvarlara istiqamət verən məlumatlar
O, layihənin təfərrüatlarına toxunaraq bildirib: «Bu layihə ekranların hazırlanmasını, yenidən işə salınmasını və istifadəyə verilməsini əhatə edir. Bu ekranlar vasitəsilə zəvvarlara maarifləndirici və istiqamətləndirici məlumatlar, eləcə də Ərbəin ziyarətinə dair xüsusi dini tövsiyələr yayımlanacaq.
Bu tədbir icra və nizam-intizam proqramlarına dəstək olmaqla yanaşı, zəvvarların istiqamətləndirilməsinə və bu böyük mərasimin mənəvi əhəmiyyətinin izahına da kömək edəcək».
Xidmət proqramları
O vurğulayıb: «Bu bölmə zəvvarlara xidmət edən və mənəvi, media və icra sahələrini gücləndirməklə yanaşı, Ərbəin zəvvarlarını qarşılamaq üçün İmam Əli (ə) hərəmində həyata keçirilən xidmət və təşkilati proqramlara dəstək verən hərtərəfli elektron nümayiş sisteminin inkişafı istiqamətində texniki və media fəaliyyətlərini davam etdirir».
Qeyd edək ki, bu tədbirlər imam Hüseynin (ə) Ərbəini ərəfəsində imam Əli (ə) hərəmində həyata keçirilən genişmiqyaslı xidmət və icra proqramlarının bir hissəsidir. Bu proqramlar zəvvarlara ən yaxşı xidmətlərin göstərilməsi, onların hərəkətinin nizamlanması və Əhli-beyt (ə) aşiqlərinin bu böyük mərasimdə milyonlarla iştirakına lazımi səviyyədə cavab verilməsi məqsədilə həyata keçirilir.
